晴空

正在等候，下午茶送來前拍的。

又要返工啦

晴天，廿七度

今日一返工，又要開例會，仲要俾高層串我，話我"識"請假，皆因噚日又爆街喉，攪到公司冇水又冇冷氣，好似蒸籠咁!

其實，話就話放假啫，咪又成十幾廿個電話來來往往，跟呢呢路，其實，肉體放假，靈魂就返緊功，仲要俾人串，真係激死人!

始終放假，都係要離開香港會好好多!

仲忙過返工 ?!?

失驚無神落下雨，廿九度喎!



哈，偶爾放下工作，細味生活，但係唔知點解仲忙過返工喎。

比平日晚起約一小時起床，不用上班的日子，著實愉快一點。


約九時許出門，坐車到中環後，做妥了一點事，便趕著到Pacific Place和博克吃午餐，雖然，只得我倆人吃飯，卻點了咖喱羊膝、龍蝦炒飯、軟殼蟹米卷同埋芒果黑糯米，一邊講一邊吃，不知不覺間已經點三了，博克要上班，我還要去銀行。

今次，是我首次走進，中銀位於花園道的分行，小時候，聽過不少它的傳聞，估不到鏡鏡也來一個傳聞的故事，真的是很神秘，但最詭異的是，居然有數個自由行人仕，自備pizza，在內一邊嘆冷氣， 一邊開餐。 p(>_<)q

午後，趁著看電影的空檔，我和鏡鏡跑去吃了一個下午茶，名為迷你漢堡，外型趣怪好味，十分cuties!

吃完TEA，跑了去看叛諜追擊3:最後通諜(The Bourne Ultimatum)，場內有一對拿著手杖的公公婆婆，原來他們是電影迷，看到最後主角還是打不死，就喜哈大笑不停，還不知年老時的我，會否這樣子呢!

臨離去時，看見了英文版的Hommer Simpsons Poster，立即拍下他趣怪的模樣。

晚上，亞七的餞行晚宴，係嚇瓜好盞擺咗兩圍，這一整晚，哈密瓜黏著亞七，又大擺Post影相搶鏡，十分搞笑。在此祝亞七在紐約，發展順利，得閒返嚟探吓我地咁啦！　：）

雨中遠足 - 追加

雨中遠足

落大雨啦!


其實，近年來運動量不斷下降，但間中我也會去游泳或玩下跑步機，偶爾，也會在家中做些簡單運動。

但較多的卻是行山，因為，行出是較為舒適的軟性運動，可以自行設定難度、距離、時間及速度，而且，裝備簡便，就容易成為熱門活動。

就像今次行山，原本行程是，先探望婆婆，再到附近行山，點知成個車站都人山人海，還是過些日子再去比較好。一路上，濕度很高，就連汗也揮不去，後來突然下著大雨，頓時清爽起來。

香橙心太軟 - 追加

心情密碼

驟雨中的一天



雖然，最近工作有點不順，但事件總算很快平定下來。

但其實我心情算是不錯，因為，同時有許多幸運的事發生，好像前兩天，的士站排長龍時，剛巧碰到強哥開工，他即時讓我打尖上車，可以不用浪費時間等車，跟著連續兩天，老闆同Receiption哥哥都請食飯(一次的碰巧，一次是突然相請)，也收到不少的禮物，總知，許多沒預計的事卻發生著。

總算，於不順暢的日子中，送上一點點快樂和幸運! :)

由於，今晚要去飲，午餐也是在家中，弄點吞拿魚沙律，再加一點意大利黑醋，也不錯呢!

香橙心太軟

突如其來的大雨，盛惠廿九度啦


早在一個月前，小企鵝扯頭陣，拉大隊包堂學整餅!

我們一行八人，準時七時半開波!

由之前教過我們的"唔多早"亞蛇，再次教我們!

今次，呢個cake程序比較上次的黃梅綠茶蛋糕簡單，但係技巧較多，要三分餅、調朱古力、做朱古力裝飾、唧花等工序! 對於，小企鵝呢啲高手嚟講，都話三分餅同唧花係幾難，何況，我呢啲吔吔烏學生。

幸好，都不負眾望，能親手完成，有圖為証，都似模似樣，幾好玩!

備註: 其實，個餅係好甜同埋好重朱古力，所以一個六吋蛋糕，起碼有磅半重，同埋70%都係朱古力，各位on diet的朋友，夠唔夠膽挑戰佢呢!?!

講不出聲? 潮流興關菊英?

晴天、雨天、孩子天

前數天的鑊氣，雖然穩下來，但仍引申出一些小風波出來，為著撲滅這些星星之火，就連約了鏡鏡交收禮券一事也忘記，鏡鏡來電時，我還在公司，真係做到失哂暈。

匆匆忙趕至，已遲到一小時了，幸好鏡鏡沒有咋型，哈!

查實今晚，約會的主角並不是鏡鏡，而是我四位吱吱喳喳的表妹，我們相約到Karaoke自娛一番，其中的一個表妹，今年剛滿十八歲，仲成日覺得自己又索又醒，結果呢，梗係俾我哋班鬼咁精靈的表姐玩到(謝)哂啦! 由二表姐發功唱"關菊英的講不出聲"，再由大表姐發功即時重唱多一次，其間，再由三表姐係Intro段時，朗讀溏心風暴的大細契的金句，真係笑得人仰馬翻，但係最離奇係 - 講不出聲仍穩佔流行榜第四位，真係不容怱視! 哈!

味分高下 - 哈林

廿八度，成日話狂風雷暴！



上星期，Bloody Duck來電說哈林 - 庾澄慶，將會處男下海，為無記主持節目 - 味分高下，本來約好Bloody Duck，一齊去現場睇佢做節目，點知要六點鐘係九龍塘集合，對於我呢啲山咔啦返工人仕，撲到出去都要六點四、五個字，總知去唔到啦! 激死我啦!

要下個禮拜睇電視補飛!


其實，早在我學生時代，偶爾在公仔箱，看到哈林的"想念妳"MTV (當時係咁叫)，就驚為天人，因為，他的聲線真的很嘹亮，曲風又廣又多變，講真吖，就連張學友的多首金曲，也是改篇自獨有的庾式情歌，這點學友是公開認同的。自此以後，Donald Duck就成為哈林一族。


希望，能有朝一日能跟他，碰碰面拍拍照簽簽名也不錯呢。

"羊羊"得意的一天

又落雨啦!











今日，是為羊羊的"羊一"的日子(生日)，雖然，工作還未完成，也就偷偷的溜走，赴會是也。


地點係懷舊十足的"太平館餐廳"，果到啲待應先生，十分有性格，成日吼住我哋的舉動，我們點了一個二人套餐加煙倉魚餐，再點一客"梳乎厘"。


出席者包括"羊羊"(我唔提"肥X"個花名嘞)，Big-bird、大猫卡、我和番姐，啤喱巴啦，七嘴八舌，左吃右(食察)的情況下，眨下眼就吃光，那些鮮蝦沙律、煙倉魚、瑞士牛河、瑞士雞翼等美食。期間"羊羊"已經表示："亞啦伐桌，桌過嘞"!


但當大家一見到，那個比番姐個髮型還要大的梳乎厘出現(羊羊喜歡的比喻)，即刻嘩嘩聲，當然，由"豬腳"羊羊操叉，切開它分甘同味啦!


同場加映，同是點梳乎厘的蘿加伶向大猫卡微笑!! 我地仲話想幫羊羊點埋"亞姐Orange至愛熱咖啡"。

停不了的...鑊氣

天陰陰，灰暗暗，氣憤憤，激到失魂！

嘩！今日都可算是黑色星期一嘞，我俾我班下屬激死我，連環爆鑊(連番失誤)，仲鑊氣十足(這黑鍋背定了)。 (>,<)

我也不知道，是否在風平浪靜的日子久了，連警覺性也薄弱起來，一些不該錯的事，一些不該不留神的事，一些不該不準備的事，卻通通出現，說真的，這些錯誤引伸出來的後果，相當嚴重。正所謂火燒連環船，結果要總動員出擊，才能勉強將事件弄妥。

到目前為止，我的老闆和老細，也沒有咋型，可能他正在給我空間去補鑊。

況且，最近的確是有點事正在處理中，真的是分心分身不暇。但我知道沒有雨天的對照，就沒有晴天的感覺，總信雨過總會天晴。

再來新房客 - 蛇紋天子藍

入夜時份，真係有狂風雷暴，仲勁閃電3700次添呀!

佢地屬於高佬一族(高背的意思)














今日，一早就約鏡鏡去金魚街，目標是買自動餵糧機，鏡鏡就要買個沉缸的過濾盒。

最終，我地走咗去台山婆婆度睇魚仔，睇吓睇吓就發現有天子藍的蛇蚊高佬買，不過價錢略貴，婆婆於是俾咗個優惠價我，可能我用啲有限公司o既台山話同婆婆傾吓計，所以，婆婆間中都減吓價俾鄉里，哈!

最後，由鏡鏡俾錢，多謝哂! (^v^)V

暴

廿九度，狂風雷暴!



暴漲暴跌 - 恒生指數走上走落，有人歡喜有人愁，有人賺錢有人憂，有人走佬有人投。


暴燥一族 - 紥鐵工人勞氣非常，日日係九龍地王示威，但係搞早成十日都未傾掂數，又冇收入。

暴風雨天 - 天氣無常，一時熱到嘔，一時又落到唔停，都唔知想點，搞到成日袋住把遮返工。

還是暴暴飯焦最好味，令人忘憂。

喜相逢

狂風驟雨，廿八度!

今天，約會了一位濶別十多年的重要人物，重要得連鏡鏡的約會也要遷就，最後，鏡鏡當然一同列席。

一下班，就趕緊坐火車，從山咔啦工廠出市區，一路上披"雨"趕"風"，幸好比原定時間早到十分鐘，鏡鏡、加勒比同肥呈已在閒逛著。

除了鏡鏡外，我們各人心情也十分之興奮，只因可以與他再次見面。咱們一塊兒先到會面地點坐下，一邊七嘴八舌地鬧哄哄起來，就在此時，一張熟悉的面孔出現，微笑著向我們揮手，我們異口同聲的叫著他，就好像Fans見到偶像一樣。

當瑪莉安和沙蓮娜還未趕到之際，我們已急不及待地，和他交談，晚飯至凌晨時份才結束。

雖然濶別這麼久，但感覺還是和當年一樣，得知他生活安好，還是老樣子地說說笑，也感安慰，希望能於短時間內，再相約出來吃飯，就好了。

在此 祝他 身體健康 生活愉快

皮蛋夾酸薑

有時間中大雨，廿四度喎!

前兩天，均分別約了剛從泰國回來的沙梨、天光同埋KAKA去食和民，週三又約咗典泥兄咪嘈，今次中多了新成員 - 易圜，走去挑戰一個鐘內吃韓國燒烤。

終於，今日乖乖地留係公司食飯盒，點知有驚喜，Reception - Chiling原來親自出馬，整咗(自製)酸子薑，仲特登係上環訂咗糖心皮蛋(好似要成四蚊隻，仲要訂貨喎)。

嘩! 正呀咩儀態都冇哂啦! :P''''

結果，係一眾同事的狂風掃落葉情況底下，淨番個膠兜，就連相都唔記得映。

暫別了，紅磚頭

時晴時雨，涼爽的廿六度! qq(^v^)pp

今天，特意早點下班，為著回校取成績及功課。

終於，今次唔係仆倒咁返去交功課，而係趕住係office收工前攞嘢!

心情不一樣的我，細味過住半工讀的八個年頭，還記得當年，受到友人肥熊的鼓勵，是鬼但走去報讀IVE。

初時，諗住求其讀兩年，呃張沙紙返嚟! 點知兩年又兩年，一讀就八年...終於唔駛捱更抵夜，熊猫眼咁去死啲功課啦!

其實，我從來冇諗過，係咁大工作量的情況，同埋生活上的障礙情況下，可以完作學業! 學加勒比話齋，對我嚟講呢個係一個奇蹟。因為，自問付出讀書的努力唔足夠，能夠畢業已經十分開心啦。

星君仔 - 花羅漢

外面多雲有驟雨

鏡鏡家中來了新房客，就係星君仔，查實星君仔係一尾珍珠花羅漢，身上佈滿銀藍色的珠點，而頭頂還己形成頂髻，好不漂亮。

星君仔，還是一名小朋友，但膽子十分大，不怕人還想和主人多點溝通。希望可以給牠多點培訓...

至於，另一尾魚仔，牠名字叫BB，因當年帶牠回家時，牠真的是一尾魚BB，叫下叫下就叫佢做BB，當然，牠現在已經十分大了。

2D卡通片王 - The Simpsons Movie

下雨天, 涼爽的一天!

1. 布帕剛走了，週末的早上，下著雨，走在尖沙咀的街道上，人流稀疏，可能颱風剛走，許多人還好夢正甜。

一個人漫漫地散步，難得寫意游閒一番，正因距離約會時間多的是，原來，間中放慢步伐也有許多新發現。

除了，拍下這清爽的畫面，還有亞森一族的T-shirt，真是開心大發現。

一直走到電影中心，約會時間也到了，當然是看看家傳戶曉的亞森一族大電影啦!

雖然，這齣電院是2D卡通片，但一點也不覺Out，反而內容更為諷刺和抵死，就連入場的觀眾也被Homer Simpsons玩弄一番，但觀乎現場觀眾為Fans，自然受落。就連一向覺得卡通片好無聊的鏡鏡，也覺得十分有趣，佢都知點唱Spiderpig Spiderpig...la la la...la la la....

風中煮意

嘩! 難得一日早歸，當然，下廚煮下嘢食啦!

今晚的晚餐，係我用雪櫃裡面的物資做的，煮咗番茄薯仔(紅柿子土豆)牛肉湯加意大利雲吞，同埋可樂雞翼。

我用番茄薯仔牛肉湯底，加入早前買的急凍意大利雲吞(Ravioli with Meat)，十分豐富美味。

可樂雞翼呢，就係較早前，一次午飯的時候， KAKA個亞大姐教我，於是乎我就膽粗粗走去試吓煮(嘗試煮一下)，估唔到真係幾易煮(料不到很易燒的一道菜)，同埋好好味。

可能， 可樂係一種強酸的東西， 經佢一煮， 啲肉呀肥膩感呀， 乜都鬆哂，最衰屋企冇檸檬同紅乾葱，如果有埋， 我諗重錦上添花 。

講真， 識我啲friend都知， 我晚餐好少食咁多嘢! 今次， 真係破哂規舉， 最衰家陣食到好飽， 想整杯"黑牛"都唔得!! :p'''

P.S. 黑牛 - 是可樂加朱古力雪糕(巧克力冰淇淋)

陣腳亂了 - 帕布你好嘢!!

八號風球上演!

溜掉，卻來一個回馬槍!

可能太多人笑帕布無料到，結果走了，又返番轉頭。前後都唔夠一日，真係玩嘢!

前日，當大家都以為會打風，結果安排哂工作。搞完一輪，又話風勢減弱。

今日呢，同咪嘈出外食飯，順便傾傾公事。點知係出去食飯呢一個鐘頭，由一號變三號，咁啱撞到老闆，坐佢順風車，話佢知會好快掛八號波，老闆即刻吩咐秘書仔同埋我，GoGoGo 快啲安排打風的工作，都未返到公司，已經係咁打電話。

雖然個波係下晝兩點幾掛上，但係對於我地呢啲嘍囉工廠妹嚟講，一日唔安排好啲工作，啲同事外勤未歸，都要留守，最終，攪到五點鬆啲先行人。

回家途中，亞七來電，滿以為係講佢的Farewell Dinner日期，原來，佢今日Last Day, 原本訂咗成四打西餅請人食，點知打風，送唔切餅之餘，仲要呢兩日內硬掘提貨，公司啲手尾未搞掂，下星期一重要補飛，真係攞命!

查實， 原本約咗亞棗同埋亞崎返學校兼食餐飯， 結果呢， 被帕布喳喎哂囉(弄散了)!

巴黎小廚王 - Ratatouille

水皮的三號風球 - 帕布, 落大雨!

好日唔打風，初時係威係勢的帕布，原定係香港正面掠過，點知臨埋門甩腳，風速轉弱，係咁咦就拜拜去咗海南島!

正所謂打風唔成三日雨，今日就係風雨之中返工嘞!

鏡鏡返咗嚟，梗係要陪我去睇吓戲啦!

之前原本來想湊高興去睇變形金剛，但係全場爆滿，結果呢 - 仲未睇。

但係我哋反而去咗睇"Ratatouille" (五星級大鼠)，個故仔真係好夠創意，將最要乾淨的嘢同埋最污糟的嘢溝埋，仲要話明"Everybody can COOK", So, Rat can cook!! 但編編故事主角，又唔鍾意偷嘢，又要用兩隻腳仔行路，煮嘢又要洗手先，居然鍾意睇電視同埋巴黎夜景，幾盞鬼!

帕布蝴蝶

遲來的一號風球 p(>_<)q

正值八月仲夏，久違的颱風終於來臨了，但係只掛一號風球，對於做工廠妹的我(及眾同事)嚟講，更係有啲失望啦!

(^_^);;

其實，打風(刮台風)係香港嚟講，做成的損失，以數字遊戲居多，真正的人命/設施/財物損失為低。查實，係因為香港成日打風，通常起樓時，已設定樓宇可承的震動及風速，如果唔係啲樓點起到咁高都當好閒吖!

但係係好多東南亞台灣日本等地，佢地啲人民一聽到打風，就會好緊張同埋驚。原因好簡單，因為地方空曠樓宇較低密度同矮，建屋的建材多以木等建做，一但打風，真係好恐怖吓。

但對於香港人來說，八號風球，就可以唔駛返工，水塘又可以多番啲水，都咪話打風冇好嘢呀!!

Chiu-koon Effects

陰天，卅二度高溫!

個天落得兩日雨，跟住就冇落，淨熱無風。

香港天氣陰晴不定，相對地，全球股市受到美國次按影響，香港股市亦然，令我不禁想起呢個"Team" - "Chiu-koon Effects(秋官效應)"。

"Chiu-koon Effects(秋官效應)"呢個Team，絶對唔係我作，英譯版本係我係英文報紙睇返嚟，真係唔係嘢小!

其實，秋官能夠令一眾經濟學者，嚴陣以待去研究得呢個現象，絶對唔講得笑，有哂研究小組同埋寫哂論文咁。你諗吓啦，有幾多位名人，能夠係冇政治或經濟權力底下，能令到股市翻天覆地，唯獨他連口術也不用出，只出現係公仔箱就有效應嘞。

早陣子，據某報中曾報導(印象中)，秋官見家陣個市咁旺，佢諗住今次，實行唔駛再做股市另類明燈，點知佢套劇播吓播吓又嚟料啦!

秋官，你一日為"大時代"的"丁蟹"，就連重播都走唔甩呢個命運。

風雷雨電

天文台果然準, 嘩啦嘩啦咁落雨! 氣溫有廿字頭出現呀!

昨天，天氣明顯轉涼，涼風颯颯。

點知瞓到半夜二點幾，先來幾下閃電，再來幾下行雷，終於醒咗，難得一晚，冇咁熱好好瞓嘛! 激死人!

結果呢，今朝返工又遲到，仲要烏烏下，真係唔抵嘞。

好彩今日晏晝，約咗翠兒食飯，傾吓計開心番! 近排，翠兒頻頻上大陸出差，聽講仲有排搞，天時暑熱，都幾攞命! 所以，想約佢食飯都幾難吓! 其實，我同佢都幾有緣，好似命運要安排我地做同事咁款，先前大家各自離開自己工作多年的地方，加入同一間公司工作，其後，大家一先一後離開，又加入現時的工廠工作。你話幾搞事呢!

週日家務大作戰 ~是也~

太好啦! 終於落了像樣一點的大雨，酷警都除埋!!! 正!!


難得的一個無約會週日，適逢下雨天，吹正東南風，連風扇都唔駛開，的確涼爽。

原來酷熱天氣警告，已經前後發出十二日，仲超過286個小時，破哂記錄，天文台話下個星期，全個星期落雨，睇嚟地球先生真係病得好嚴重呀! 各地天氣都好極端同反常，希望大家多啲注意環保啦!

一早起身，紥起頭髮，先來一個豐富早餐，沖一杯特大Latte，再吃昨天MISAKI請我食的菠菜芝士撻，好滿足的早餐。

食過早點，當然要努力清潔下屋企啦，成個禮拜都冇時間整，反正今日有時間有Mood有精神又有體能，於將間屋由頭抹到落腳，午餐也是求其吃個短法包加橙皮占，再試下MISAKI拿給我的台灣東瓜茶，又當一餐。

跟住又嚟過，今日係好誇張地完成多項動作，洗換床單被袋洗衫、抹窗抹廚櫃又抹牆、洗冷氣機個格塵網、洗抽氣扇、抹傢俬、抹地洗廁所、仲洗埋魚缸添。做完已經六點幾，後尾先醒起，唔記得去剪頭髮，結果仲熨埋衫。

其實，我間唔時，就會忽然勤力，一鼓儍勁咁完成!! (^^);;

大異國迷錄 - A貨搜記

大異國迷錄 - 多用途篇

今日，跟亞TA講開，由於近年老翻名牌商品肆虐，講到呢幾年都冇乜買名牌手袋，原因係唔想拿住個正牌貨出街，俾人估吓真定假之餘，又或者同假貨撞袋，仲要被人問下你個袋係邊度買，冒得好似喎，咁真係咩Mood都冇哂啦!

搞到要搵啲冷門或者唔HIT牌子買之餘，又要唔好有老翻出，一出老翻就情願收埋唔用好過用，一係就攞番啲舊款，冇乜人用冇翻版，先夠膽攞出街用死未吖!

點知亞TA仲抵死，佢話曾經見過一位老人家，揹住個超大Size的"LV"手袋，跟著那位婆婆走進一個街市(菜市場)，然後，將啲買完餸的魚呀菜呀肉呀，塞哂入個袋入便，其實，個袋係A貨，婆婆仲以為佢係BYOB，真鬼馬!!

亞TA牛一，Cake 一 Cake!!

今日又卅幾度，寫到好悶啦! 幾時先落雨喎!!


查實，真係好耐冇見過亞TA，諗起上次見面都已經係舊年的事。難得今日亞TA同MISAKI時間上配合到，抽空來我家一聚。


最衰呢個禮拜，忙到嘔，擺到都冇時間執吓間屋，好彩佢地都唔介意。正所謂三個靚女一個墟，不停講東講西又一Day，其實，我同亞TA早期職業相近，所以，次次都傾得好投契。

由於時間的關係，原本諗住訂個蛋糕俾佢，最後，都係今朝先走去買一個。好彩份量啱啱好，又幾好味，亞TA仲覺得佢幾靚添。在此謹祝佢心想事成，事事如意。