MOL界 之 肥呈再現

終於出現大大舊黑雲，仲係卅四度喎!! ?_?;;

MOL界乃指為人做事ME-ME MOL-MOL中人 (指做事漉糯(Lop-law)/慢條斯理，請高人指教"ME-摸"點寫)，此君就是"肥呈"，乃加勒比之胞妹。

此姝數年前，走咗去加拿大度"HEA"(無所事事)，唔好意思，應該係話讀書至真，以佢係MOL界的功力，我地成村人仲係等緊佢畢業(希望我地有命等到啦...)，努力啲啦衰妹，加幣好貴呀。

爆咗佢一小部份的頽廢事，係時候要講番小小好嘢，都算佢有心，記得係加拿大買嘢俾(買東西給)我食，返嚟仲識(回來還記)得第一時間，搵(找)我亞媽同亞爸去飲茶。

雖然，今個週日放我飛機(放鴿子)，話同啲Friends去"滴滴嚟"，如果有唐老鴨做手信，就OK當無數啦!!

那有人偷走你的乳酪? Stupid!

歷史性記錄，酷熱天氣警告，已掛超過150小時啦!
- 氣溫33度，濕度卻76度!! ~熱到痺~ @_@;;

哈，這是一個十分沒禮貌的主題，特別係用上Stupid這種貶詞! 但有感此字更能"肉緊地"(切實地)反映真實感受。

Mr Stupid乃一名敦厚之輩，就連想用A字膊，卸鑊俾下屬，都被下屬當場踢爆，更被下屬當眾大罵，十分...! 咁高咁大的，就更加無人專重，上司就更加唔駛講!

反之，他的一名下屬卻獲得眾人的敬重與通力合作。無他o既，人家是尊重自己的工作與職責，於年初派成績表時，公司予以合理的回饋(升職加人工)。

話說回頭，Mr Stupid在同一工作單位，已經超過十多年，人家說十年人事幾翻新，他卻屹立不倒，十多年不變包括人工同工作態度...唉!不過佢o既上下左右隔離已經多咗好多人，查實己到了可有可無的地埗，尚欠一個揹鑊(揹黑鍋)機會便功成身退，嗚呼哀哉。

最可笑是，工作至今也不清楚自己的工作崗位，混沌度日(有呃飯食之嫌/騙點開飯錢)，對於同事們的查問，只會說"我唔知喎，你自己唔去問唔去追"甚至乎"你可以唔做喎"，上司吩咐的工作，百份百叫下屬去做，自己卻一竅不通，仲問點解老闆唔俾時間佢做，對於老闆的指責與查問，就只有捱罵卻沒反駁之力，皆因十問九不知。

唔駛問阿貴，今年年頭又冇人工加啦，但卻儍呼呼的Mr Stupid，越級查問上司的上司，問點解佢冇份加人工?!

我諗好多睇過呢段文章的朋友，都可能有共嗚，公司內總有幾位Mr Stupid，只不過有些人手法高明一些就當了老大，有一些卻一心等公司解僱攞錢鬆人，有些卻心生疑問/怨恨點解乜都冇我份...。

前兩者還有點自知，至於後者，就只有一句 ~Stupid~!!

高溫"近"足

今日咪又係咁燜熱囉，啲驟雨咪又係好似趕住收工咁款!!



本來，一心諗住係(在)鏡鏡屋企，進行地獄式家務大掃除行動，點知熨完衫(查實都冇一個鐘/事實上就連一句鐘也沒有)，就熱到我死咁滯(熱到就快溶掉)!於是乎扮哂嘢話(佯裝一下)，抖一抖食完飯再來個(食過飯休息一下再來)。

點知(怎料)食完飯，見到電視做叮噹(我死都要叫叮噹呀，吹咩!!小學館，你告我我吖，笨!!)，結果眼定定(目不轉晴)，睇咗約半個鐘(一看就半句鐘)，就發現鏡鏡已經瞓著咗(睡著)。

後來，鏡鏡話不如去行山，我梗係唔制啦(當然不依)，下午兩點正，仲要(還要)行山，仲唔中暑咩(還不會中暑才奇怪)!!

幾經講數，結果三點幾先出發，太陽伯伯雖然準備收工，但係仲好熱，比起平時行起上嚟，辛苦好多，用的時間多咗!

平時，我哋會由屋企出發，行到目的地，連埋食嘢(食東西)，再行埋返屋企，都係兩個半鐘至三個鐘頭咁上下。今次一落山，就座小巴去食嘢，未計食嘢時間，都用咗個半鐘有多!

不過，行過山出過汗，個人真係精神啲! (但係真係要注意自己，身體狀況，因為，進行時，流汗同心跳比率，會比平時流得多，同埋跳得快好多!小心小心)

果真熱到爆?!

今日話係入夏以來 ~最熱~卅四度!! ~_~;;

昨晚臨睡前，啲驟雨好似趕住收工咁，作狀咁落咗唔夠卅秒，就走頭，笪地由乾變濕，再變番乾，都唔駛幾分鐘，真兒嬉!

晨早起床，餵完魚仔食早餐，及修剪好盆栽後。己經急不及待，跑去沖個凍水涼，真涼快。

外出了一會，回家放低東西的時候，不管約鏡鏡的時間就到，也把身上的衣服換掉...到吃午飯的時候，又告冒汗，真係好似穿咗窿的水桶一樣!

原本想去看Transformers，點知得番第一行，都係遲啲再睇過。結果，同鏡鏡走咗去睇魚仔。

晚上，約咗老豆同亞媽去食壽司，食食下工廠同事來電，話工廠樓下爆水管，家陣有幾層樓冇咗冷氣...果真熱到爆?!

掙扎◎提神

半夜三更，仲係卅度，酷熱警告仍然生效喎!

昨夜，小企鵝到我家作客，講下講下唔覺唔覺，最終搞到成三點先撻落床瞓。由於，工作地點係山卡啦咁遠，臨睡前先催眠自己，記得起身返工。

今早，一聽到鬧鐘響，就即刻彈起身，一路上己覺得很睏，返到公司睇多兩隻字仔，就仲想瞓。於是，即刻買咗罐凍0T(凍檸茶)提神，但係都唔多掂，可能平時已經唔多夠瞓，就係咁放蚊。於是，就由早到晚飲咗N咁多杯茶。

看來今晚要早點休息，因為，我今日係問自己個肝借錢來返工，遲早都要還o架!!

難得一聚

今早起床，天陰陰，雖然仲有啲熱，但係有驟雨同雷暴警告! ^_^

昨午，今次小Ring-ring牛一(生日)，有位好冷門的同事出席，同我地五位靚女一齊食晏(跟五位漂亮的女生食午餐)! 在坐的同事，居然未(還未有)有人試過同佢一齊食晏，犀利呢(利害)! 佢就係我地工廠內其中一位車手 - 小文嘞!

平日小文業務繁忙，食無定時又未必可以係公司食，能同枱食飯，我地個個都覺得好(很)難得。

小文係咁多位車手裡面，佢算平易近人，我地平時都有講有笑。因為職務關係，佢同工廠好多老闆的車手一樣，其實唔可以隨便同人傾計講笑(對我嚟講都幾慘)，如果唔係，佢點會深得某些超高層老闆的歡心呢。

晚上，居然同三位超biz的朋友食飯(包括我都好busy)，呢個(這個)約會係由二、三月開始約，終於成事...哈哈，真係幾誇張喎!

事原係今年新年前，Donald Duck作出生活上的改變，幸得Bloody Duck 同佢細佬Bumper的幫忙下，得以順利完成。為答謝他們，於是作東"霉食"一頓(食得很隨便)，由於三位人仕屬於超忙一族，加上大家工作休息時間不同，所以先咁誇張啫!

呢排Fully Booking的小企鵝得知，也抽空見一見呢兩位超忙人，也屬難得。

遺產與回憶

梗係酷熱天氣啦! 夜一夜都廿九度，冇嘢呀!?



今日Lunch，我地班工廠妹工廠仔，浩浩蕩蕩十八個人，走咗(跑)去飲茶。場面咁偉大梗係(當然)有喜慶啦! 就係工程裝作部的大佬同佢的小弟爹利牛一，於是咪搞咗兩圍囉!

老闆今日心情大好，今日早會佢突然之間走入嚟(走進來)，當然，吩咐完我地的工作安排，又走頭(溜之大吉)!

臨收工，老闆仲send咗佢的不定時特刋，今期內容夾了兩份信報的剪報。其中有一段(好像是一位自稱叫老曹的筆者寫，但我不肯定是否曹仁超先生)，內容是提及「財富係過去的遺產、將來o既希望，一個冇財富o既人代表佢有過去(除咗回憶)...」我對這番話堯有趣味。

即是話，冇遺產就等於冇將來，但對於一些先駛未來錢的朋友來說，是不是連將來也沒有呢。某程度是對的，因為你己經預先"行駛了選擇權"，所以剩下來就要履行之前的義務，換句說話嚟講，即是要還債，老實講，還完債後，除了歸還欠單外，還剩下怎麼呢...可能是辛勞吧!

大異國迷錄 - 彊硬中學 混戰 唔化中學

大異國迷錄 - 太陽底下無新事??


於七月十三日，拜讀am730報紙，看到一段令人忍俊不禁的新聞。

話說江蘇泰州有兩所知名的重點中學，為咗爭客(有潛質的學生)，首先"姜堰中學"就來個公開考入學試搶客，居然，另一所"興化中學"的老師們，走入去破壞是次考試，強行搶試卷，仲要撕爛兼掉埋去，簡直同爛仔冇乜分別。

最後，報警兼兩間學校講數，雙方同意已被取錄的學生，另一方不能重覆取錄。

講真吖，香港開埠百多年，競爭性雖強，但不至於要用武力同講數方法解決，老師是為人之患，面對啲咁o既質素的老師，真係唔荒唔憂患!! 攞命!

最搞野係兩所中學的原名，令我聯想到他們"彊硬"同"唔化"!! XD

暑假並唔係細路仔的專利

酷熱天氣警告，炎炎夏日，晚晚都成卅度!

今日，同動漫迷 - Misaki聊咗一陣，發覺今個暑假檔期，唔知點解咁多卡通片上畫，我雖不是動漫迷，但係有好多套都很有興趣，睇嚟呢個暑假有排忙呢!

The Simpsons Movie 同埋 Ratatouille(加勒比同國寶佳佳極力話要睇)，就係必睇項目，滑浪奇兵(企鵝仔實仆到去睇同類啦)同魔法小胡蘆好似都唔錯，反而Misaki就想睇變形金剛。至於大雄的恐龍，就冇人吼，因為，我地的年代係死都要叫"叮噹"，反而直接讀日文Doraemon，仲來得自然一點，現在的官方名稱，實在太不知所謂啦!

英姐生日快樂

大暑呀! 卅三度，仲好多人中暑呢!!

上個星期，己經約好咗V秘書、C秘書同智智等一行八人，同英姐賀夀!!

席間同國寶佳佳提起，呢個六月至九月，完全係生日旺季，淨係今個星期，公廠已經有三位同事生日，就連lunch的booking都爆哂，好鬼誇張呢! 可能個個媽咪都要趕開學，所以，好多人都會係左近出世! 我都唔例外，嘻嘻!Y( ^v^)Y

Choco Duck

又卅幾度，仲要熱到幾時!!

今日，又晨早起床，趕住深入不毛之地交人，因為，鏡鏡同佢家人飲茶。

茶過三巡，眾人麻雀蟲痒庠，除咗基本腳友，今次，仲有肥妹仔個亨利落場，結果俾佢割禾青走掉。

是日DD Duck打電話我，佢話大陸同澳門都好鬼哂又熱。仲哂到變"Choco Duck"。

Keroro軍曹大戰花比枝 是也~

是日都係炎熱喎!
















週六晚，本想更新旮旯，點知(怎料)網站維修，未能成事。為有今日一次過搞掂(攪定它)!!

週六，約咗加勒比去睇早場"Keroro軍曹大電影2 之 決戰水著兵團"，我地晨咁早十點幾就仆到去睇十一點場(我們一早就趕去看早場)，因為比正常價平成廿蚊雞(便宜多廿塊錢)一位。由於爆滿的關係，我地兩位老人家坐第三行，睇到頭都則(看到頭也歪)。

場內九成是細路(小孩子)，其他係家長亦有一些十來歲的，看來最老(年紀最大)係我同加勒比了。

電影當然好睇啦，而且氣氛仲好好添，因為班細路好有反應，又笑到咔咔聲，仲即時討論，好不熱鬧。但係啲家長就有一半瞓咗覺!

睇完戲，本想去打保齡球，但係都幾貴下(蠻貴的)，於是乎走咗去食晏同埋Shopping(改去食午飯和買東西)。

黃昏時份，我地糶咗去銅鑼灣，同美艷親王集合，我地早到去咗CT雪扒同埋蓮CAR伐，唔覺意仲撞到(偶遇)關芝琳同三名壯男同行。佢真人比上鏡後生(年輕)得多，啲手腳同皮膚仲好以十零歲女仔咁款(好像女生模樣)。

係加勒比的左穿右插底下，終於到達燈籠街的住家泰菜店，食物水準OK，最好食係豬手同埋蝦餅，不過真係好低食(便宜得很)，我地一行八個大人加一個小朋友，九碟菜，每人都係四十幾蚊咋!!

飯後，我地去咗咖啡店飲嘢同埋傾計，全場焦點更係哈密瓜小朋友表演 "豬腰醒一花比枝"(查實，人地係表演國語朗誦 -不要成日發脾氣)，哈哈!!


P.S. 時代廣場 - 有王永平先生的作品展，仲有被裁定不雅的作品 - 亞當同夏娃。(講真，都唔知當局用咩定義話不雅)

Sunset and Shadow

這是今天，黃昏時路經文化中心時，隨手拍下。

其實，香港其實己經擁有很多東西，只要注意大家保護/保育/保留環境，便可持續下去。

社火百戲 - 清明上河圖 舞蹈詩

咪都係咁熱囉，天文台話下週三先有驟雨, 等下啦老友!!

今日Lunch，約咗KAKA食飯，佢話正在減肥，希望可以係下月初去泰國前達標，可以穿三點式示人。

順道，秘書仔牙仔痕，搭單買芝士蛋糕，我同KAKA見到啲蛋糕咁靚，我自己都買咗一個吔，KAKA話佢精神上食咗，果然忍得口。

今晚，又準時放工啦，因為，鏡鏡約咗我睇清明上河圖 - 舞蹈詩，初時大家都驚太過藝術，點知，真係好精彩，節奏明快，亦能活形活現出清明上河圖的神髓，最精彩是社火百戲，最澎湃是逆水縴夫，最熱鬧當然是河市百態。

但係有個女舞蹈員，頻頻出現小錯，唱汴河之歌時，有條Sound Track出現問題，希望明天公演時，能順順利就更好了。

臨走時，我同鏡鏡講，好嘢好嘢冇瞓著....哈哈!

P.S. 曾柱昭先生填詞的柳絮曲，很不錯喔!!

柳影碎玉飛花 舞衣暗香入懷 尋夢寒食堪冷寂
霧雨欲借東風 幾多深意俳徊

願那倦絮早歸汴河 桃花春汛付託子規

柳枝催拍裙染香汗
越紵疊雪飛霜
細腰纖軟胡旋
夜聽夜聽踏舞吳歌

大異國迷錄 - 低胸姊妹

大異國迷錄 - 多聲道篇

其實，大異國迷錄係專講一些，光怪陸離的事同埋日常生活的搞笑事件，希望在此和大家分享。

先旨聲明，這篇純粹係有位朋友，因為一些障礙，引發的笑話，當時人其實都十分...當然，無任何褻瀆神明之意。請睇埋落去先啦!!

話說，呢位仁兄，是一位虔誠的教徒，呢個笑話，係多年前到上海公幹時發生。

公幹期間，留宿的酒店附近有一間教堂，碰上週日，當然要去啦!

在早會期間，他才驚覺是說普通話，由於不諳普通話，只好硬著頭皮撐下去，心諗我識睇中文，唔駛"栗"。一開始，尚算順利，因為可以偷睇下隔離位教友嘛, 人地打開那一頁，自己就2仔底死跟!

問題發生啦，神父係咪度講 : "各位低胸姊妹，請站起來。"

他低頭望一望自己個心口，又用奇異的眼光，望下旁邊的人，佢心諗，國家開放啫，點解教會都咁開放o既，點解返教會要著低胸，仲要企起身...想得出神之際，突然發現身邊無論誰都企哂起身，為有死跟啦，咁突出坐係度!

後來，於晚飯的時候，就請教一位當地同事，同事聽後，無不捧腹大笑，解釋又講極都唔明，最後，在紙上寫上"弟兄姊妹"。

朋友，學好啲兩文三語啦!!

勞動日 Vs 偷閒

又卅度，想點呀，太陽伯伯都收咗工啦! 我係都唔開冷氣瞓，同你"練"過!! >,<

今早，一返到公司，嗱嗱臨(趕快)食早餐仲飲咗盒凍0T(還喝凍檸檬茶)，始動!!

人算不如天算，原來裝修(裝潢)師傅師仲係度歎慢板(還在慢條斯理)，可怒也! 蘇位(電位)又未有DV位(data & voice socket)都冇...終於，係我的推動/督促之下，終於部機可以如期，係上午入位同埋試機。但係其他的配套，卻未如期完成，明天仲要繼續。激死人啦(氣死我)!

呢壇嘢(這件事)，由今朝搞到下晝四點幾(由早上弄到下午四時許)，攰到嘔，梗係早啲抖(累到透，當然早點休息)!

準時鬆人(按時溜走)，嘩，都唔知幾耐(很久)未試過見到太陽放工(下班)，真係感覺良好! ^v^V

早咗返屋企(早了點回家)，先發現原來附近有一家小食店，價錢都OK! 熱氣(上火)都食咗一隻炸雞脾(雞腿)，再飲番杯涼茶，一樂也，今晚要早啲瞓先得(早點休息就對)!!

有關留言方法

卅一度，晴!!! 又話陰天?!

有朋友跟我說，很想留言給我，但不懂!

你們看看圖，其實，每段文章的右下角，都有一個"0 comments"的字樣(圈圈那一個)，只要Click一下，留言的版面便跳出來。

務請大家湧躍留言，可以多些Interactive嘛!!

多謝哂!! m(_ _)m

約定.....

久違了驟雨，點解仲係廿九度，天都黑齊啦!!

今天不知為何，跟許多人作了不同的約定，人氣急升得很。

工廠篇:

1. 同下屬約定 - 明天，我旗下的一個Section要搬位，大陣仗!! 因為，有部機要搬嘛!!

2. 同輝哥 & 秘書仔 約定 - 由於，不想影響工廠運作，confirm電同裝修，幫手搬老闆個位。

3. 開會 - 梗係大把嘢跟啦!

4. 午飯 - 咪提過同典泥兄仲有咪嘈兄囉

朋友篇:

1. 暑期班 - 小企鵝做hold，我地打算包堂學香橙心太軟呀!!

2. 餞行 - 梗係要同亞七吔番餐飯啦!

3. 生日 - 亞TA生日，梗係要約啦!!

4. 約會 - 鏡鏡話星期五 - 有個表演看!!

5. 臨睡前約定 - 加勒比係Msn話，佢要約我，有手信喎......

全天候無間的約定.... @_@;;

奢侈的午餐

陽光依然普照，終見罕有的黑雲 + 午飯時灑果幾滴雨, 物以罕為貴!! ~_~ HOT ~_~

上星期，約定"典泥兄"同埋"咪嘈"一齊去吃飯，地點係我去都未去過的教院，淨係係新聞見過咋!

嘩!一落到車，就覺得果度勁靚sss(很漂亮喔)，風光明媚翠山倚巒，遠眺大尾篤，加埋低密度式建築設計，簡直仲靚過好多大學(更漂亮)，同埋豪宅(確實附近有好多豪宅)。

唔怪得知"遊戲漿"(好鍾意玩魔寶石果位仁兄)，咁想(很想要)中大吞埋佢啦! 我地三人小組都好理解佢當時的心情。

進入了中菜廳，典泥兄好恨坐窗邊，原來好鍾情呢度的落地玻璃加綠茵草地，又真係幾正喎(蠻不錯耶)!!

講真食物水準一般，價錢合理(五十八蚊一個單人餐= 一碟小炒+一碟炒菜+白飯+甜品)，環境是重點。陽光同綠草，對於我地成日踎係(處於)寫字樓，不見天日的工廠妹同工廠仔嚟講(來說)，真係好奢侈的一件事。

我地點咗(點菜)沙薑鹽焗雞同花枝炒通菜，再加埋幾籠點心(多點幾款點心)，就係一餐幾唔錯的午餐了。

又嚟咗新房客 - 火炙松石

狂風暴雨列為失蹤人仕冇返工，夜闌人靜仲廿九度!!

又冇搞錯......

今日，鏡鏡送了一對火炙松石俾(給)我，台山婆婆仲計平成(還給打折)六十蚊俾我呢!! qq(^V^)pp

剛買回來之時，檸檬BB顯得好緊張，梗係啦人地大條過佢咁多(人家體型比較大)...點知會唔會吔埋佢(誰料到會不會把牠吃掉)!!

最驚險係，松石都好鬼緊張(很緊張)，人家都係去到一個陌生環境嘛。對檸檬BB又好緊張咁迫埋缸邊(走避)，但係松石諗住大家走埋一堆冇咁驚(走在一起沒那麼怕)，點知避避下，由缸底迫到缸面...唉! 結果呢，有一條BB咪跳咗出嚟囉，嚇餐死真陰公(嚇破膽很隣)，好彩即刻救番。

但係唔夠一兩粒鐘，佢地好似Friend咗咁，走埋一堆(走在一起)，仲成日係度望我做公司的嘢!! 真八掛(諸事丁)!

強勢連網 - 好友加盟

又話狂風雷暴，點知仲係卅二度，囇死人啦!!

其實，Blog呢樣嘢都存在咗一段時間，係我之前兩年又兩年，無間忙碌，冇玩埋一份咁解啫!

今日，問准咗其中兩位小姐，佢地一個部落係講煮嘢食，仲連結咗好多隱世高手，一個就講不平則鳴的瑣事同埋饕餮 - 四圍食同玩。

至於，另一位小姐，就近排忙於工作，遲啲補飛再問啦! 總知，Madam唔好拉我偷步Link-up你個playground 就得啦!! :P

請各位多多捧場，同埋留言俾我吖!!

Twins

驟晴驟雨，都係咁熱喎!!

今天，無意中在Msn的List上看到一位舊朋友，最近也寫Blog，但係佢寫的是新娘子日記同懷孕的心情。

其實，這位朋友年紀和我相若，感情路上的經歷比同齡的女生多，在此希望她和家人幸福，靜待一對小寶寶來臨。

瑪姫，我地遠在香港都會支持你的! ^v^V

典型週日節目 - 飲茶 + 竹戰 = 香港人星期天

酷熱天氣警告 - 香港就嚟冇冬天!?

今日，行程緊密，穿勻港九新界。(話時話，平時呢兩樣節目我都好少可做，仲要一日過做哂!! ^v^;; )

一早起床，先碌過去對面海，同美艷親王飲茶，同場還有好耐冇見的亞七，同久違十載的牛哥，當然唔會少得花仔個份啦!

所謂一早起床，查實去到利舞臺已屬正午時份，" *嚇瓜好盞 "人頭湧湧，果然大市暢旺，啲人特別捨得洗錢(花費)。

**講番美艷親王，出廠不久的佢(出院不久的她)，精神尚可，但硬件不濟，三肢疼痛不堪(仲有一肢OK)，醫生亦吩咐她要戒口。為了減輕痛楚，佢話有成十支按摩藥膏，輪流應用，但係佢都知"中冬青油毒事件"，已盡量小心同少用(笑)。

至於亞七，佢就快過New York發展啦，過埋今個暑假，佢就會去NY返工，在此祝佢一帆風順，記得去到果邊，搵間大啲o既屋，就算我地是但邊個去到，都可以掛下單(到了紐約，找大一點的屋，好讓我們多一個地方落腳)。

飲完茶，又急急腳(腳拂拂)撲去鏡鏡屋企開戰。

一路上，天氣真係熱到痺，炎夏的中午，仲要等巴士的我，簡直冇命!!

點知(沒料到)一去到，眾人已被麻雀蟲咬得癢癢，正進行攻打三方城中?!! 當然，我的加入情況好玩好多啦! 其實，腳方面除鏡鏡同我，仲有Tiger同Never，呢四個人裡面，分開初中高班 ==> 我唔會指名道姓o既(哈)，Tiger梗係讓我地果個啦。

後來Never個"亨利"(Honey)嚟咗，玩法即刻唔同哂，是關呢位仁兄係高手嘛!佢有啲好"驚"典(得人驚)的絶技，就係一切由兩pair半做起。咩叫做"兩pair半做起"，意思係見到人家大牌，自已仲未入章，就算得一兩對牌，都做對對糊，實行你叫我又叫，分分鐘仲可以做"破壞之王"之餘，仲見過佢變埋*"大混對"(八番)。我初時，以為佢講笑，有幾次係佢後面望佢打牌，佢試過表演由一pair半做起，當然梗係計食得出，先得人驚啦(好利害)!!

不過，我地純粹娛樂同打牙鉸戰，多過賭博，是關我地係玩一毫子一個籌碼，你地唔一定啱玩，嘻嘻!!

備註:

* 嚇瓜好盞 - 其實，嚇瓜好盞是借廣東話諧音，但是"嚇瓜"和"好盞"在廣東話來說是有別意，"嚇瓜"是嚇死，"好盞"是很有趣很爽的意思。

**講番 - 話說回來

***大混對 - 混一式加番子牌

新房客 - 檸檬BB

作死啦 - 今日係入夏以嚟最熱 ~ 爆!!














前幾日，同鏡鏡吃完飯後，走咗去台山婆婆度睇魚仔，佢話十三號晚有新魚仔返，仲有好多特別種類，叫我捧下場。

於事乎，就趁未去"砍"之前，就泡落去睇下，反正我要置過啲魚仔。就係咁，我就揀咗呢兩條檸檬BB神仙魚，希望，佢同條BB琵琶仔相處愉快。

史葛兄小登科之喜

昨晚，聯袂馬可兄賀一賀，史葛兄小登科之喜。

查實，史葛兄初邂逅愛瑪仕小姐，已經十分緊張，又擔心呢樣又怕自己表現唔好。Anyway, 有情人終成眷屬，咁咪証明你地倆口子有緣，如今拉埋天窗，恭喜恭喜!!

話時話，史葛兄呢個"wedding扒地"，攪到好似annual dinner 咁，居然利用六合彩方式，抽冧把，如果仲哂六個字(只抽六個數字)，就送你卅二吋電視機，二奬就分五千蚊，三奬就視乎人數，均分二千完奬金。

最後，居然無人中，所有奬金就均分俾中咗兩個字同三個字的賓客，每人一封利是仔，個個都開心，馬可兄都有份呀。

順風車 – 老闆真係好人呀!!

好猛太陽呀!!

話說 Donald Duck 的職業為工廠妹一名，工廠係山卡啦咁遠(位於偏遠的地區)，相對於，由細到大都係九龍人的我，每日都深入不毛咁返工。

工廠附近，除咗工廠同工廠之外，都係工廠，完全冇食肆，平時出入就係坐的士、巴士同小巴(計程車、公共汔車和小型公共汔車)。

但係講到食晏O既黃金一小時，就梗係的出的入啦(坐計程車出入是也)，但係每逄週一同埋週五，草蜢(綠的)十分缺貨，絶對有客冇車。平時，我會Call架相熟車接載，點知亞強哥今日冇開工，落到街邊，搵架車睇下都冇，一邊行一邊截，眨下眼已經等咗十五分鐘，越行越遠，又囇又徬徨。 =_=;;;

就係呢個時候，我同同事講，如果等唔到的士，但係見到老闆架車行過的話，都要試下截老闆架車...哈哈。實情只係講下笑啫!!

點知就係度亞Q緊的時候，老闆架車真係路過噃!! 奇蹟呀奇蹟呀!!

老闆真係好好人，主動停車接截埋我地出去食飯，食完飯仲叫秘書仔，打電話問我地一唔一齊走，連回程都關顧埋我地，老闆貴為GM，都全無架子，真係好人，超讚!!

健康也是財富

炎炎夏日 - 夜一夜都卅度...咩天氣來的?!

今天，跟"企鵝仔"煲了一陣電話粥，才知道"美艷親王"入了養和醫院...其實，早兩個星期已知，她身體不適，但她仍堅持去台灣幾日...真係貪玩。 結果呢, 咪入廠(醫院)囉!!

傍晚時份，致電慰問一番，佢仲同我講(她還跟我說)，咁大個人都未試過(一直以來還未嘗過)，個(健康)成績表滿缸紅咁屎(這麼爛)。咁我就約咗本週日去探下佢，點知佢一聽到有節目，成個人即刻醒神哂(馬上精神起來)，其實佢食咗好多藥，成日都好攰(很累)好需要休息!!

除咗美艷親王外，咁啱得咁橋(恰巧)，我仲有個Friend啱啱出廠唔夠(出院不足)一個星期，話說"天天"早排有啲乞啑，就啪兩粒丸仔(吃兩顆成藥)，以為就搞掂啲感冒，誰不知仲搞出個大頭佛出來(弄巧成拙)，個心口痛到成個人唔郁得(胸口痛，不能動彈，呼吸困難)，又勁發高燒，最終打橫咁坐白車入廠(躺著坐救護車進院)!! #_#;;

原來，呢位仁兄感冒菌入骨，而且啲菌好惡，搞到佢瞓咗幾日深切治療部，因為，佢個肺的x-ray片花咗，醫生驚佢肺炎或者其他上呼吸道疾病。真係一鑊泡!!

所以，老套啲講句，注意身體健康，健康也是財富!

工廠妹旮旯 - 啟動

其實，一直都很想開番個個人部落，但早前一直忙於工作、忙於返學、忙於搬屋、忙於......香港人就是這樣，真係忙到都唔知忙乜嘢，總知忙啦。

查實，小妹曾幾何時，曾經好經典咁，唔用任何programme幫手，用手打html語言，起咗我偶像個Anglo-chinese homepage，仲得到我偶像的留言，簡直開心到飛起。

講番呢個Blog，初步構思會講好多好多關於生活上的點滴同埋睇法，仲會講啲笑話過你地知。

哈哈，我諗我好多Friends都估唔到，我咁多搞作。不過，有啲死黨都知我鍾意搞下呢樣搞下個樣，無時停。各位老友記，請多多捧場。

總知，今晚抽起條根，就動手開工啦!!


備註: 各位支持我的老友記，唔該用我個大名 "Donald Duck"稱呼小妹啦!!